កំនាព្យផ្សេងៗ

បទសរភញ្ញ

សូមថ្វាយបង្គំព្រះសម្ពុទ្ធ	ប្រសើរបំផុតក្នុងលោកា
ជាគ្រូនៃមនុស្សនិងទេវតា	ទ្រង់ត្រាស់ទេសនាប្រដៅសត្វ ។
ចង្អុលឲ្យដើរផ្លូវកណ្ដាល	មាគ៌ាត្រកាលអាចកម្ចាត់
ទុក្ខភ័យចង្រៃឲ្យខ្ចាត់បាត់	អាចកាត់សង្សារនិងទុក្ខបាន ។
សាសនាព្រះអង្គនៅសព្វថ្ងៃ	ឲ្យមាននិស្ស័យពីបុរាណ
ប្រឹងរៀនប្រឹងស្ដាប់ចេះចាំបាន	កាន់តាមលំអានបានក្ដីសុខ ។
ឥតមានសុខណាស្មើក្ដីស្ងប់	បញ្ចប់ត្រឹមសុខឃ្លាត់ចាកទុក្ខ
តាំងពីលើកនេះតទៅមុខ	ក្ដីសុខនឹងមានព្រោះធម៌ស្ងប់ ។
ខ្ញុំសូមបង្គំឆ្ពោះព្រះធម៌	ព្រះសង្ឃបវរទាំងសព្វថ្ងៃ
រួមជាត្រៃរ័ត្នគួរគោរព	ជាម្លប់ត្រជាក់នៃលោកា ។
ព្រះរូបព្រះធាតុនៃព្រះពុទ្ធ	សុទ្ធតំណាងអង្គព្រះចេស្ដា
សូមគុណត្រៃរ័ត្នជួយខេមរា	ឲ្យបានសុខាតរៀងទៅ៕

 

បងឃ្លាត​តែ​កាយ But think of you!

បងឃ្លាត​តែ​កាយ But think of you!
Monday បងចង់ Visit ពៅ	Tuesday បងត្រូវ​ go hiking
Wednesday រៀម​គិត buy a ring	Thursday ​បង bring it to you	។
Friday រៀមគិត say good bye	Saturday ឃ្លាត​ឆ្ងាយពី​ឆោម​ឆ្លៅ
Sunday airplane ហោះ​ចេញទៅ	Please ពៅ don’t say I ទៅរៀន	។
I will sent you some Money	ទុកគ្រាន់ជីវី pay something
Powder bracelet និង ទំនិញ	ដែល​រូប​ស្ងួន think ថាសំខាន់	។
Twelve months មិនយូរទេ darling	Please ពៅ​កុំ think I jilt you
When I return I គិតគូ	Marry និង you ជាប្រាកដ	។
ដកស្រង់ពី ៖ សប្បាយ សប្បាយ

អ្នករត់ម៉ូតូឌុប

អ្នករត់ម៉ូតូឌុប
ទ្រីនៗទ្រឺនៗលឿនដូចហោះ	ឆ្វែលឆ្វាត់ផ្លេកផ្លោះកាត់ទីក្រុង
ឌុបអ្នកដំណើរមិនអែអង់	ត្រេចត្រង់ត្រឹមត្រូវមិនប្រមាថ	។
ថ្ងៃខ្លះឌុបតាយាយមីងអ៊	ថ្ងៃខ្លះក្រៀមក្រំរកស៊ីខាត
អត់មានអ្នកជិះសល់តែកាត	មុខជូរដូចត្មាតដេកចាំព្រៃ	។
ថ្ងៃខ្លះមុខរីកដូចគ្រាប់ជីរ	បានឌុបនារីស្រស់ពេកក្រៃ
ក្លិនក្លួនក្រអូបដូចចំប៉ី	រំភើបដួងចៃតែម្នាក់ឯង	។
រាល់ថ្ងៃដឹកឌុបអស់មនុស្សសត្វ	វត្ថុគ្រប់សព្វមានកញ្ច្រែង
ឧស្សាហ៍ធ្វើការយ៉ាងរអែង	ប្រឹងប្រែងញើសហូរប្តូរជីវិត	។
បាយត្រឹមបាតឆ្នាំងអាំងត្រីងៀត	ហូបចុកត្បិតត្បៀតមានកំរិត
សន្សំលុយកាក់ផ្ញើញាតិមិត្ត	ម៉ែឪក្រពិតឯស្រុកស្រែ	។
មួយថ្ងៃសន្សំខំតក់ៗ	រកស៊ីដង្ហក់មិនត្អូញត្អែ
របរសុចរិតមិនលួចគេ	សូមព្រះយាងថែលុះភ្លឺស្វាង	។
ដោយ ៖ អ្នក​ស្រី កែវ​ ច័ន្ទបូរណ៍

កំណាព្យ

បងសូមលាអូនទៅសិក្សា

បងសូមលាអូនទៅសិក្សា	តាមពាក្យសន្យាប៉ាម៉ាក់បង
សូមអូនថែរក្សាខ្លួនផង	ព្រោះអីរូបបងឆ្ងាយពិសី	។
មាសស្ងួនកុំបារម្ភទុក្ខព្រួយ	ចិត្តបងមានមួយនោះគឺស្រី
អូនជាខ្មែរមារយាទថ្លាថ្លៃ	បងសូមបេតីតែស្រីខ្មែរ	។
សូមអូនអាសូរដល់ចិត្តបង	កុំងាកបែរខ្នងរាប្រួលប្រែ
សេចក្តីស្មោះត្រង់នៃស្រីខ្មែរ	អូនគប្បីថែខ្ជាប់ក្នុងប្រាណ	។
បងសូមសន្យានិងអូនថា	ពីរឆ្នាំទៀតណាកែវកល្យាណ
នោះយើងទាំងពីរគង់តែបាន	សេចក្តីសុខសាន្តនៃស្នេហ៍យើង	។

កំណាព្យ

អនិច្ចាសិល្បៈខ្មែរ

គួរឱ្យអនិច្ចានិងហួសចិត្ត	វាគឺរឿងពិតមិនម៉ែនមុសា	នូវកេរ្តិ៍ដំណែលសិល្បៈដូនតា
	ពេលនេះប្រែជាធ្លាក់ក្នុងអវចី ។
បំបូរហូរហៀរក្រុមហ៊ុនផលិត	តែមិនបានគិតនិងឱ្យតម្លៃ	សិល្បៈដូនតាធ្លាប់តែល្បាញល្បី
	មិនបង្កើតថ្មីចាំតែចម្លង ។
អ្នកខ្លះតាំងខ្លួនជា Super Star	ច្រៀងស្រែកឡូឡាស្តាប់មិនទំនង	ខ្លះទៀតCopyយកបទរៀមច្បង
	ខ្លះអួតអ្នកផងច្រៀងបទបរទេស ។
បទចិនអង់គ្លេសកូរ៉េឬសៀម	ខ្មែរអាចច្រៀងតាមបានយ៉ាងពិសេស	មិនខ្វល់គេថាលួចបទបរទេស
	បើតែយ៉ាងនេះខ្មែរនឹងវឹកវ ។
មិនគួរចង់មានបានដោយការលួច	គេនឹងប្រដូចយើងថាជាចោរ	ដូចពួកអាសៀមចោទរឿងអង្គរ
	តើខ្មែរត្រេកអរទទួលយកទេ ?

កំណាព្យ

ឱវាទព្រះពុទ្ធ

ព្រះពុទ្ធឱវាទបីប្រការ	ទុកជាសាសនាព្រះជិនស្រី
ប្រដៅសត្វលោកទាំងប្រុសស្រី	បានសុខសួស្តីដូចប្រាថ្នា	។
ទីមួយហាមសាងអំពើរបាប	លាមកឆ្អេះឆ្អាបគ្រប់អាត្មា
ដូចជនជាប់គុកគួររអា	បានមានផល្លាគួរស្មាលា	។
កុំសាងអាក្រក់នាំក្តីទុក្ខ	បាបជាជង្រុកកម្មវេរា
បីដូចស្រមោលយើងគ្រប់គ្នា	តាមគ្រប់វេលាទាំងយប់ថ្ងៃ	។
ទីពីរត្រូវសាងអំពើល្អ	កុសលបវរអចិន្ត្រៃយ៍
សន្តោសសង្គ្រោះអធ្យាស្រ័យ	ការមានតម្លៃត្រូវខ្ញីឃ្មាត	។
សាងល្អជាថ្នូរដូរយកសុខ	ជាស្បៀងកប់ទុកកុំរវាត
ជាតិនេះជាតិក្រោយគ្មានទុក្ខបៀត	បុណ្យជួយគ្រប់ជាតិដល់និពាន	។
ទីបីអប់រំទូន្មានចិត្ត	ឱ្យល្អប្រណីតមិនបំពាន
កុំល្មោភចង់បានមិនខ្មាសអៀន	សន្តោសត្រូវរៀនមានមេត្តា	។
ចិត្តជាប្រមុខជាប្រធាន	ទប់ចិត្តទើបមានក្តីសុខា
កុំបីភ្លើតភ្លើនក្នុងទោសា	ពាលាមោហាអបាយមុខ	។
ឱវាទទាំងបីត្រូវចងចាំ	ធ្វើតាមបណ្តាំព្រះផ្តាំទុក
គ្រប់ពេលវេលាជាត្រីមុខ	យើងពិតបានសុខសាន្តរៀងអើយ
ដោយ ភិក្ខុ វ៉ង់ សុភស្ត

ស្រឡាញ់ស្ទើរតែលេប

ឱ ! កែវនិមល	ចិត្តបងខ្វាយខ្វល់	ព្រោះតែនឹកស្រី
បងស្ទើរតែឆ្កួត	ភ្លឹកស្មារតី	ចង់ប្រាប់ពិសី
	ថាបងស្រឡាញ់ ។
ចង់ស្រែកឱ្យលាន់	ឱ្យបានរាប់ពាន់	ពាក្យថាស្រឡាញ់
រូបអូនស្អាតណាស់	សក់រួញអង្កាញ់	បងសូមស្រឡាញ់
	តែអូនមួយនាក់ ។
ជួនកាលបងខឹង	ពេលកែវព្រលឹង	មានប្រុសរាក់ទាក់
បងប្រច័ណ្ឌអូន	តែរូបស្រីម្នាក់	បងសូមរួមរ័ក
	លុះអវសាន ។
ទោះកើតជាតិណា	បងសូមប្រាថ្នា	ជួបកែវកល្យាណ
គ្រប់ភពគ្រប់ជាតិ	ផ្ញើជីវិតប្រាណ	សូមឱ្យបងបាន
	ជួបតែពៅស្រី ។
ពេលអូនស្ងាត់ឈឹង	បងព្រួយទន្ទឹង	មើលតែផ្លូវស្រី
ថាតើរូបអូន	សុខទុក្ខឬអ្វី ?	បងស្ទើរតែក្ស័យ
	ព្រោះតែព្រួយអូន ។
សូមអូនមេត្តា	ទៅណាមកណា	រក្សាថែខ្លួន
ឱ្យដំណឹងផង	តាមអ៊ិ-មេលអូន	កុំភ្លេចណាស្ងួន
	ព្រោះបងទន្ទឹង ។

បណ្តាំចុងក្រោយរបស់មាតាបិតា

ប៉ាម៉ាក់គាត់តែងប្រាប់ខ្ញុំថា	ឱ្យខំធ្វើការសន្សំប្រាក់
រកបានហើយត្រូវចេះទុកដាក់	ព្រោះអំណាចប្រាក់ជួយយើងបាន	។
កូនអើយបើយើងរកប្រាក់គ្មាន	អ្នកផងបំពានលើខ្លួនប្រាណ
គេមើលថោកកូនដូចតិរច្ឆាន	កូនគង់តែបានជួបក្តីទុក្ខ	។
ប៉ាម៉ាក់មិនចង់បានអ្វីទេ	ចង់ឃើញមាសមេបានក្តីសុខ
មុនគ្រាខ្លួនផុតកម្មអស់ទុក្ខ	ពីនេះទៅមុខគ្មានម៉ាក់ប៉ា	។
ពេលម៉ាក់ប៉ាស្លាប់ចាកកូនទៅ	សូមកូនមាសពៅចុងរក្សា
តាំងខ្លួនឱ្យខ្ជាប់ក្នុងធម៌អាថ៌	ព្រមទាំងរក្សាប្រទេសផង	។
ដោយៈ ឈន់ សុទ្ធិពង្ស

ដំបូន្មានមាតាបិតា

កូនថាសម័យទំនើបថ្មី	ត្រូវទិញឡានថ្មីទើបសង្ហា
ទាំងទូរសព្ទនាឡិកា	ទៅណាមកណាមិនខ្មាសគេ	។
ឯប៉ាម៉ាក់គាត់បានពោលថា	ឡានថ្មីនោះណាមិនបាច់ទេ
ទូរសព្ទនាឡិកាទ្វេ	គ្រាន់មានដូចគេក៏បានហើយ	។
កូនម៉ែគួរតែសន្សំប្រាក់	ត្រូវផ្ញើទុកដាក់ក្នុង Bank អឺយ
ខំរកស៊ីកុំធ្វើព្រងើយ	គ្រាខ្លួនចាស់ហើយមិនលំបាក	។
ទោះកូនមានទូរសព្ទថ្មី	ពេលកូននិយាយប្រាក់ចេញចាក
អស់ប្រាក់ហើយកូនគង់លំបាក	ព្រោះខ្មែរនោះយ៉ាករកប្រាក់ណាស់	។